Սև թեյն օգնում է նիհարել. 168.am

Սև թեյը դրական ազդեցություն է ունենում աղիների միկրոֆլորայի վրա և կարող է նույնիսկ օգնել ազատվել ավելորդ կիլոգրամներից։ Med2.ru-ն գրում է, որ այս եզրակացությանն են հանգել Կալիֆոռնիայի համալսարանի գիտնականները, որոնց հետազոտության մասին հայտնել է «European Journal of Nutrition» ամսագիրը։

ԱՄՆ-ի գիտնականները հետազոտության ընթացքում եկել են համոզման, որ սև թեյը ևս օգնում է ազատվել ավելորդ քաշից։ Հետազոտությունն անցկացվել է 4 խումբ մկների շրջանում։ Առաջին խմբում կենդանիները քիչ քանակով ճարպ պարունակող սնունդ են ստացել, երկրորդում` հակառակը՝ մեծ քանակով ճարպ պարունակող մթերք են ստացել։ Մյուս երկու խմբերին գիտնականները կերակրել են յուղոտ մթերքով, սև և կանաչ թեյերի էքստրակտով։ Արդյունքների ամփոփման ընթացքում պարզ է դարձել, որ կենդանիները, որոնք թեյը ստացել են` որպես հավելում, նույնպիսի քաշ են ունեցել, ինչ ցածր յուղայնությամբ սնված կենդանիները։ Ընդ որում, գիտնականները նկատել են, որ սև թեյի էքստրակտ ստացած կենդանիների աղիներում մեծացել է Pseudobutyrivibrio բակտերիաների ակտիվությունը, որոնք ազդում են նյութափոխանակության գործընթացների վրա։

Հետազոտողների խոսքով՝ սև թեյն ազդում է նյութափոխանակության վրա, փոխում էներգիայի փոխանակությունը լյարդում, ինչը պաշտպանում է ավելորդ կիլոգրամներ կուտակելուց։

«Նախկինում համարվում էր, որ կանաչ թեյն ավելի օգտակար է նիհարելու համար, քան սև թեյը։ Մեր հետազոտությունը ցույց է տվել, որ սև թեյը ևս որոշակի մեխանիզմի միջոցով կարող է նպաստել քաշի նվազեցմանը»,- նշել է հետազոտության ղեկավար Սյուզաննա Հեննինգը։

Հարցեր, պատասխաններ, մեկնաբանություններ